Ilmona Hamza është një profesioniste në fushën e edukimit fizik, mirëqenies dhe ushqyerjes, e cila ka ndikuar në mënyrë pozitive në jetën e mijëra vajzave dhe grave, duke i udhëzuar drejt një stili jetese më të shëndetshëm dhe aktiv.

E lindur në Tepelenë dhe rritur në qytetin bregdetar të Sarandës, Ilmona që në fëmijëri kalonte orë të tëra duke notuar dhe duke marrë pjesë në aktivitete sportive. Në shkollën fillore, mësuesi i saj i edukimit fizik dalloi talentin e saj dhe e regjistroi në maratonën e qytetit. Edhe pse Ilmona nuk mundi të marrë pjesë pasi maratona u anullua, mësuesi e motivoi duke i dhënë një "Certifikatë stimuluese." Ky gjest i vogël i dha një kurajo të madhe, duke i shtuar forcën për të ndjekur pasionin dhe te trajnohej akoma edhe më shumë. Në vitet që pasuan, Ilmona fitoi çdo maratonë për femra në grupmoshën e saj.

Në gjimnaz, shkathtësitë e saj fizike dhe përkushtimi i tërhoqën vëmendjen e mësuesve, të cilët e inkurajuan të ndiqte një karrierë në sport dhe edukim fizik. Ky udhëzim e shtyu të regjistrohej në Universitetin e Sporteve të Tiranës, ku ndoqi studimet me pasion dhe përkushtim.

Sot, Ilmona është një profesioniste e licencuar, me një listë të gjerë diplomash dhe certifikatash që reflektojnë pasionin e saj ndaj edukimit dhe shëndetit.